同胞的妙語

今天坐小巴,聽到以下一段妙問妙答.

(先此聲明:本人對以下人仕的職業,國藉,性別,智慧,談吐並無偏見,蔑視或歧視的成份.本人只是將每天所聽所聞的節錄,與好友分享.一切內容以本人的記憶盡量如實報導,並非虛構.而有關人仕之意見或對話,並不代表本人或本站的立場.如內容對任何人仕造成任何傷害,滋擾,困惑,恐懼或不安,本人深表歉意.)

司 - 小巴司機
女 - 祖國同胞(一中年女人)

(小巴剛過了理工學院,往觀塘方向)
司:你地係唔係去紅磡?
女:(如夢初醒)o下?
司:你地係唔係o係紅磡落車?
女:係.o係邊到落車?
司:你去紅磡邊到?
女:紅磡o係邊到落車?
司:(開始放棄)係XX落車啦.(XX為一有名氣的傢俐公司)
女:我地去紅磡喎.
司:係呀.XX落車行天橋過對面就係.
女:o係邊到落車話?
(幸好此時小巴剛好到達XX;不然,我想司機可能因與此女同胞拘纏不清而吐血暴斃,引致嚴重交通意外及人命[小弟條命都包括在內]傷亡)
司:(如獲重釋)呢到落啦,過o左橋就係紅磡.
(女子於是與友人下車;由此女子付二人全數車資.司機收錢後...)
女:找錢啦.
司:你俾幾多錢呀? (司機連忙看看錢盒.我心想:難到你收錢唔數下嫁?)
女:十三蚊一個呀嘛.我俾o左...
司:啊,唔洗咁多.(開始拿錢找贖.)
女:(好似聽唔到司機講話)...三十三蚊你呀.我俾一張二十蚊,佢(指她友人)俾左十三蚊.十三蚊o個個唔洗找,二十蚊o個個要找!
(我心入面真係即刻啤一聲:大姑,你唔好玩啦.兩個人廿六蚊,你俾三十人地找咪得囉.做乜俾人地三十三蚊,然後要人俾返o個三蚊你咁有聊?!)
...